Phili 1 | APZ | STEP | Sekwo Anɨtuye a'amu soku ango Filipai humawo'nɨngkohofo somne'no ngko Poulɨ'nnonji Timouti'nji nekwo Hwe Engo Jisas Kɨlaisɨye syoho ulohofiyo sohwoya'i olo iyoswo loso semtɨ'mokiyalokuhwayo. Sekwo Hwe Engo Jisas Kɨlais oso hune'no sɨmeho uyɨwo'nɨngkohofo so'nnonji a'amu sekumo semokosyohumayo'ne uhwosopo'mentohofo sohwanji a'amu Anɨtuye syoho somne'no sefo'mawo'nɨngkohofo sohwatnne'no semtɨ'mokiyalokuhwayo.

Philippians 1

1 Sekwo Anɨtuye a'amu soku ango Filipai humawo'nɨngkohofo somne'no ngko Poulɨ'nnonji Timouti'nji nekwo Hwe Engo Jisas Kɨlaisɨye syoho ulohofiyo sohwoya'i olo iyoswo loso semtɨ'mokiyalokuhwayo. Sekwo Hwe Engo Jisas Kɨlais oso hune'no sɨmeho uyɨwo'nɨngkohofo so'nnonji a'amu sekumo semokosyohumayo'ne uhwosopo'mentohofo sohwanji a'amu Anɨtuye syoho somne'no sefo'mawo'nɨngkohofo sohwatnne'no semtɨ'mokiyalokuhwayo. 2 Mpohumo olo'no jomo ulɨwo'nɨngkuhwoyo. Nanɨngkwohwo Anɨtu sohwo'nji nakwoe Hwe Engo Jisas Kɨlaisɨ'nji siko'monta'i siko sekumo wopɨngo selohofohosɨsi sekwoe sɨmeho pompenjiyo wosejopanjiyoho. Oso'no jomo ulɨwo'nɨngkuhwoyo.

Poul kako Anɨtumo isamoyoka ulɨmentisofoho.

3 Ngko sekumne'no huno syasyefɨsyontnne sɨkuno somo ngko nje Anɨtumo isamoyoka ulɨwo'nɨngkohono. 4 Hwapɨngoso sekwo Anɨtuye hungkuno sɨkuno sɨmo'mjo upo'noma'mentohofo somta'ni sekwo Jisas Kɨlaisɨye hungkuno wopɨngo a'amumo ujo'ne syoho somne'no nɨfo'ma'mopɨwo'nɨngkohofo kuyoho. Oso'no ngko Anɨtumo sekumne'no jomo ulɨwo'nɨngkohe sohonta ngko sɨmonyo iwo'nɨngkohefoho. 6 Ngko huno ole nto niyohi, Anɨtu kako sekwoe sɨmeho mo'mo syoho wopɨngo ema'mentiso sohwo oso syohoso ne'no mjɨmopɨhwosi sekwoe honɨngkano wopɨngo imokuhwosi nakwoe Hwe Engo Jisas Kɨlais kako asomo poso sohonta Anɨtu oso syoho wopɨngoso moi'wo wesojwamo'montonoho. Sekwo honɨngkano wonyo ane'njo humantɨfitnne kuyoho. 7 Ngko sɨmeho sejopalokweno. Ngko sekumo hitoho sejopalokweso ito'nohinofoho. Hwapɨngoso ngko impo'angomo mohumayo sohonta ngko Jisas Kɨlaisɨye hungkuno wopɨngoso a'amu somo ulonji hungkuno hiso'no a'amu ngkimo ntohonɨngkahonɨngkofi ngko aku hungkuno ulahonɨngko hungkuno hiso yokumpohn'nyo imo'nɨmentisofoho. Oseso hungkuno nehopeho ntɨmentisofoho. Oso hohosohontajo so'nji olohonta ngko impo'angomo humale lohontajo'nji sekwo ngkimo nɨfo'ma'mopɨwo'nɨngkohofofoho. Sekwo Anɨtumne'no yokumpohn'nyo lohofontɨfi ngkine'no syonɨfɨsyontɨfi Mpohumo ngkine'no jomo ulɨwo'nɨngkohofofoho. Oso'no sekwo ngko'nji majopohi'nontani nakwo Jisas Kɨlaisɨye hungkuno wopɨngoso a'amumo lutɨhwawo'nɨngkuhwoni'nwoho. Ose humentanɨngkuhwoni Anɨtu kako kakoe wopɨngoso nalohofɨwo'nɨngkiso hweho. Oso'no ngko sekumne'no sɨmeho wopɨngo nɨmo'nɨngkohoho. 8 Anɨtu kako nje sɨmehomo tɨmo uhwonɨwo'nɨngkisofoho. Oso'no kako olo hungkuno selalokwe loso nehopeho huno uyohoho. Oso ngko sekumne'no nɨmo'nantokunjoso nehopi sejopalokweso nakwoe Hwe Engo Jisas Kɨlais mta'angofoho. Oso'no Jisas kako sekumne'no sejopalokuso hopa ngko sejopalokweno. Oseso ngko ole nɨmo'nɨmojoso wasehonɨmonne'no yohono.

9 Mpohumo sekumne'no jomo ulalokwe loso olenoho. Sekwo Anɨtu'nji a'amu nom'ne'ntnne'no hitoho selofalokunjoso engo imo'nɨngkuhwasi ne'no mjɨmopɨhwosi mɨkunɨmposo engo umo'nono. Oso'nji sekwo Anɨtumne'no huno engo tɨpemafɨkuji yo'mayo yahino so'no huno ito'no fɨsyafɨhupmno. 10 Ose syafɨsyɨkuji yahino wonyoangkafo'nohino somo huno syafɨsyɨkuji osomnohini uyɨmno. Oso'no Mpohumo sekumne'no ulalokweno. Ose ifijo'manji sekwo honɨngkano wonyo ane'njo imo'nɨngkuji Jisas Kɨlais kako a'amufe hungkuno ikwolofo'ne sɨkuno somo kako ole selonefoho. Sekwo wopɨngo'nohini kuyoho. Wonyo honɨngkano ane'njo kuyoho. Ose selonefoho. 11 Ou, sekwo olopo nohumafɨkuji Jisas Kɨlais kako'nohino kakoe yokumpohn'nyo sejapɨhwosi sekwo honɨngkano wopɨngo'nohini uyantɨfeho. Oso hohosohonta sekwoe humayo wopɨngo'nohino somo a'amu nosehonɨngkuji Anɨtuye yofe engo noho'nomafɨkuji Anɨtumo isamoyoka ulantɨfeho.

Poul kako impo'angomo humayo so'no a'amu pi'nɨngo engoso Jisasɨye hungkuno upa'nɨmentohofofoho.

12 Nje a'amu soku, ngko impo'angomo humale so'no sekwo huno ole seyɨhwoloho. Jisasɨye hungkuno wopɨngoso impo'angomo into'naweho. Ose syafɨsyɨkutoho. O'o, yo'mayo ngkimo tango nɨ'mahonjoso a'amu pi'nɨngo engoso hofɨko Jisasɨye hungkunomo upo'nalokwofo. 13 Ngko impo'angomo humale kalohi nakwoe hwaho mokosyohumayo Sisa oso hwoe a'amu nehontohumayo hopi'nonohino sohwanji nom'ne a'amu olopo humalofo sohwantnne'no Jisasɨye hungkunomo upo'nalokwofo. Hofɨko huno ole uyohoho. Ngko Jisas Kɨlaisɨye syoho ulohofiyɨwo'nɨngkohe so'no impo'angomo humaleno. 14 I ngko impo'angomo humale so'no a'amu Anɨtumo sɨmeho hi'ntnnono we'e uyɨwo'nɨngkohofoso hofɨko impo'ango somne'no iyoho ko unɨngkahonɨngki hofɨko ngkimo nohonɨmentohofo so'no hofɨko iyoho munyofoho. Oso'no hofɨko Anɨtumo sɨmeho hi'ntnnono engo uyontɨfi kakine'no yokumpohn'nyo humalofo. Oso'no hofɨko a'amu somne'no iyoho miyo'njo yontɨfi Anɨtuye hungkuno yokumpohn'nyo ulalokwofo.

15 A'amu fehohnjo huno wopɨngo'njoso hofɨko Anɨtuye yofe ho'nomayo'ne Jisasɨye hungkuno yokumpohn'nyo ulalokwofo. Oso a'amuso hofɨko olo so'no huno uyohoho. Ngko Poulɨ'ni olo impo'angomo humaleso Jisas Kɨlaisɨye hungkuno ito'nohino lɨwo'nɨngkohe so'no Anɨtuye hungkuno yokumpohn'nyo sosofitofosyohumayo'ne impo'angomo humaleno. Oso'no hofɨko ngkine'no hitoho ulofahonɨngki hofɨko Anɨtuye hungkuno yokumpohn'nyo ulalokwofo.

I a'amu nom'ne fehohnjoso hofɨko nje syohomne'no sɨmeho wonyo umo'nɨngkahonɨngki nje yofe monje yanisyontɨfi hofɨko hofɨkoe yofe ho'noma'nyo'ne Kɨlaisɨye hungkuno nom'ne a'amumo nto'no mulalokuyohofo. 17 Oso'no hofɨkoe hunoso nto'nohinɨ'maho. O'o, hofɨko ngkimo woniyokolofantɨfi hofɨko ngkimo tango wontopantɨfi yontɨfi hofɨko Anɨtuye hungkuno nto'no mulalokuyohofo. 18 Huno ose ko syofɨsyahonɨngkofi ngko sɨmonyo yalokweno. Hwapɨngoso a'amu hofɨkoe yofe ho'noma'nyo oso hwanji a'amu Anɨtuye yofe ho'nomawo'nɨngkohofo sohwanji hofɨko Jisasɨye hungkuno ho'nɨmɨwahonjo so'no ngko sɨmonyo yalokweno. Oso hiso olohonta'nohinɨ'maho. O'o, ne'no wamjɨmo'nɨ'montefoho.

Ngko olo hwaho lopo songo humaleso Jisasɨ'nji humalohwoyo.

19 Olo hiso'no ngko huno niyohoho. Sɨkuno huhwo huhwi sekwo Anɨtu ngkimo nɨfo'mayo'ne jomo ulahonɨngkofi Jisas Kɨlaisɨye Towahuno nɨsosofitofahonjo so'no yo'mayo tango nɨ'manteso ngkimo wopɨngo ntohofantofoho. Oso'no ngko huno nɨyohoho. 20 I ngko olo so'no nɨmo'nɨngkohoho. Ngko yo'mayo i'meso ngko wonɨmango mannonehoho. O'o, ngko Jisas Kɨlaisɨye hungkuno so'no yokumpohn'nyo loho'mne hopaso yokumpohn'nyo ne'no waloho'monnoho. Yo'mayo syoho Anɨtu ntapɨwo'nɨngkisoso ito'nohini uyɨmonne'no yohono. Olohonta'nji yo'mayo i'me'no Jisas Kɨlaisɨye yofe engo imo'none'enji yalokweno. Ihwoni, ngko poyo pe'nɨ'mo, u songo humahm'me'no ngko ole'no nɨmo'nɨngkohoho. Ngko Jisasɨye yofe woho'noma'monnoho. 21 Nje hunoso olenoho. Ngko songo humaleso ngko Jisasɨ'nji songo humaleno. Oso wopɨngofoho. I oso'no ngko poyo pe'nɨ'mo Jisasɨ'nji Anɨtu'njopo humayoso oso yakolo'nnyofoho. 22 Oso'no ngko huno hufa'u'njo hwo'nyoho. Sɨmo'mjoso olenoho. Ngko olo hwaho lopo humahm'mo Anɨtuye syoho imeso ne engo mjɨmo'nɨmɨwesoso oso wopɨngofoho. Oso'no ngko pipi imnehono. 23 Olo hilo so'no ngko sɨmeho hufa'u'njo hwo'nyoho. Ngko nope'nɨ'me'no Jisasɨye ahwomomjo ango sopo humayoso olo hwaho loponjo humayo somo yakolo'nnyofoho. 24 I oso'no ngko poyo pe'nɨ'me'no ngko sekumo pipi sefo'ma'mnehono. Oso'no ngko sekwo'nji humahm'mo sefo'mayo oso wopɨngofoho. 25 I ngko oso hiso'no sɨmeho hi'ntnnono uyonji huno ole niyohi, Ngko sekwo'nji humahm'mo Anɨtuye syoho ne'no mjɨmɨhwasi sekwoe sɨmeho hi'ntnnohino uyoso engo imo'nɨngkuhwoso'no sɨmeho wopɨngo mɨkunɨmposo wasemo'nɨmontonoho. 26 Oseso ngko sekumo apa'no se'mahonɨ'mo sekwo ngkine'no sɨmonyo ikuji sekwo nakwoe Hwe Engo Jisas Kɨlaisɨye yofe woho'nomantɨfeho.

A'amu Filipai so'nji Poulɨ'nji nomajoku'nɨngkuji Jisasɨmne'no tohino womantɨfeho.

27 U, ngko sekumo mose'maso'njo ime sohonta sɨkuno huhwo huhwi sekwo Jisas Kɨlaisɨye hungkuno tɨfi inɨngkakuji wopɨngo'nohini fosyohumamno. Ose ifijo'manji ngko sekumne'no hungkuno upa'nɨ'maleso olenoho. Sekwo sɨmeho anga'nohino so'nji nomajoku'nɨngkuji sekwo Anɨtuye hungkuno a'amu somo lutɨhwafɨkujo'no hofɨko Jisas Kɨlaisɨmo sɨmeho hi'ntnnono uyantɨfeho. A'amu fehohnjo Anɨtuye hungkuno nakwolaho selɨkujo'no sekwo yokumpohn'nyo ne'no lohofɨkuji kakoe hungkuno ne'no wolutɨhwantɨfeho. Oso'no upa'nɨ'mo. 28 Sekwo oso pa'nyo nomajoku'nɨngkuji sekwoe mango sohwamne'no iyoho masenonehoho. O'o, sekwo Anɨtumne'no yokumpohn'nyo filohopmno. Ose ikujo'no mango sohwa hofɨko nosehonɨngkuji huno ole uyono. Nakwo tɨkanomne'nwoho. Hwapɨngoso Anɨtu kako hofɨkimo yokumpohn'nyo sosofitofosyohumentanɨngki uhwonalokuhwono. Oso hunoso Anɨtu kako sekwoe mango sohwamo uyɨmontonoho. I sekwo huno ole waseyono. Anɨtu kako sekumo sefo'mawo'nɨngkiso sohwonji sekwo kako'nji songo ne'no humantokutnne kuyoho. 29 Sekwo a'amu Anɨtu'nji makotɨku'nyo sokumo Anɨtu yahino hufa'u sekwoe sɨmeho wopɨngo semokiyo'ne sejapmmentisofoho. Nom'ne anga'no sejapeso olenoho. Sekwo Kɨlaisɨye yokumpohn'nyo sefo'mayo'ne somo sɨmeho hi'ntnnono uyalokwofo. Nom'ne sejopalokunjoso olenoho. Sekwo Jisas Kɨlaisɨmne'no tohino womantɨfeho. 30 Hohonta ngko sekwo'nji humamentohe sohonta sekwo ngkimo nto nohonɨmentohofofoho. Ngko Anɨtuye hungkuno a'amumo ujoso'no ikujoho pa'nɨngo syoho yokumpohn'nyo imotefoho. I olohonta sekwo upo'nalokwofo. Ngko oso pa'nyo ne'no yonji olohonta tango ne'no malokweno. Sekwo olo so'no huno waseyono. Sekwo ngko'nji majopohi'nɨmentɨhwone so'no Anɨtumne'no yokumpohn'nyo lohofontani yo'mayo tangoso hinjoho'nɨmo ne'malofoho.